افسوس ہم نے وقت کی قیمت کما حقہ نہیں پہچانی چونکہ ہم دولت کی قدر کرتے ہیں اس لیے جب ہماری دولت ضائع ہونے لگے تو ہمیں افسوس ہوتاہے اور نہ صرف یہ کہ ہم اپنی دولت کو ضائع کرتے بلکہ غیروں کی دولت کا بھی احترام کرتے ہیں لیکن ہمیں کبھی افسوس نہیںہ وتا جب ہمارا قیمتی وقت ضائع ہورہا ہو یا ہم دوسروں کا قیمتی وقت ضائع کررہے ہوں کیسے کیسے بیش بہا گھنٹے گراں قیمت مہینے نایاب سال اپنی آنکھوں کے سامنے ضائع ہوتے دیکھتے ہیں اور ہم غفلت کی نیند پڑے ہوتے ہیں‘ہزاروں ایسے دیانتدار آدمی موجود ہیں جو اوروں کا کوڑی تک کا نقصان کرنا روا نہیں رکھتے اور اگر ان کے دل میں بھولے سے بھی یہ خیال آجائے کہ کسی کی کوڑی کی خیانت کررہے ہیں تو اس خیال سے بیشتر اپنے ہاتھوں کو کاٹ ڈالیں لیکن یہی دیانتدار آدمی وقت جیسی بیش بہا چیز کو چوری کرتے ہیں مگر ان کو ذرا خیال نہیں آتا وہ کس اخلاقی جرم کا ارتکاب کررہے ہیں حالانکہ اگر ہم کسی کا مالی نقصان کریں تو کسی حد تک اس کی تلافی کرسکتے ہیں لیکن اگر ہم کسی کا وقت ضائع کریں تو اس کی تلافی کبھی ہو ہی نہیں سکتی‘ ایک سکاچ اور بیت کا مقولہ ہے کہ کاروباری آدمیوں کے لیے اس سے بڑھ کر کوئی مصیبت نہیں ہوتی کہ چند نکمے آدمی ملاقات کے لیے آکر ان کا وقت ضائع کرجائیں‘ بیکاری سے بڑھ کر وقت کو تباہ کرنے والی اور کوئی شے نہیں‘ یہ ایک ایسی لعنت ہے جو ہزاروں عیبوں کا ایک عیب ہے۔ مارکس کیٹوں نے اپنے نوکروں کو حکم دے رکھا تھایا تو کچھ کام کرتے رہیں یا سو جایا کریں‘ وہ بیکار جاگنے والوں پر سونے والوں کو ترجیح دیتا ہے کیونکہ بیکار رہنے سے بڑھ کر کوئی اور لعنت نہیں ہوسکتی۔ اس لیے حکماء نے کہا ہے کہ ہمیشہ کچھ نہ کچھ کرتے ہو ایک شخص نے کسی سے پوچھاکو تمہارے بھائی کی موت کا کیا باعث ہو‘ اس نے جواب دیا: ’’بیکاری‘‘ جب یہ جواب ایک فوجی جرنیل نے سنا تو اس نے آہ بھر کر کہا: واقعی بیکاری ایسا مہلک مرض ہے جو بہادر سے بہادر جرنیل کو مار ڈالنے کیلئے کافی ہے۔یادرکھیے! جو اپنے بچپن کو سستی اوربیکاری میں ضائع کرتے ہیں‘ نوجوانی میں بھی انہی عادات کی غلامی کریں گے اور جو جوانی میں سست اور بیکار رہتے ہیں وہ بوڑھے ہوکر بھی اسی لعنت میں گرفتار رہیں گے۔ وہ آدمی جو دونوں ہاتھ اپنی جیبوں میں ڈال کر قیمتی وقت ضائع کرتا ہے جب دوسرے کام کررہے ہوں تو وہ بہت جلد اپنے ہاتھ دوسروں کی جیب میں ڈالے گا۔